Mintaqaviy hamkorlik milliy maqsadlarga xizmat qiladi. Hukumatlar qo‘shnilar bilan hamkorlikni tobora ko‘proq cheklov emas, balki o‘z ustuvor maqsadlariga erishish vositasi sifatida ko‘rmoqda. Shu bois Avazadagi kun tartibida qo‘shma ishlab chiqarish, infratuzilmani muvofiqlashtirilgan holda rivojlantirish va kelishuvlarni amalda ro‘yobga chiqarish masalalari markaziy o‘rin egalladi.

Kaspiy mintaqaviy kun tartibining bir qismiga aylanmoqda. Markaziy Osiyoning G‘arb bozorlariga chiqishi Kaspiy orqali o‘tadigan yo‘nalishlardagi portlar, temir yo‘llar, energetika tarmoqlari va tranzit tartib-taomillariga bog‘liq. Ozarbayjon ishtirokida bu aloqalarni alohida-alohida kelishish o‘rniga mintaqa doirasida muvofiqlashtirish mumkin.

Moslashuvchanlik aniq majburiyatlarni talab qiladi. Muayyan loyihalar atrofidagi integratsiya ustuvor yo‘nalishlari turlicha bo‘lgan suveren davlatlarga ko‘proq mos keladi. Bunda mas’uliyatning aniq taqsimlanishi, kelishilgan muddatlar va natijalarni muntazam baholash asos bo‘lishi kerak.

Ishlab chiqarish zanjirlarini mavjud quvvatlar asosida shakllantirish lozim. Prezident Shavkat Mirziyoyevning «Olti iqtisodiyot — bir mahsulot» tashabbusini, avvalo, qishloq xo‘jaligi mahsulotlarini qayta ishlash, to‘qimachilik sanoati, mis asosida elektrotexnika mahsulotlari ishlab chiqarish, istiqbolda esa muhim minerallar sohasida amalga oshirish imkoniyatlari yuqori. Birgina 2026-yilning birinchi yarmida O‘zbekiston $1,6 milliardlik to‘qimachilik mahsulotlarini eksport qildi.

Rasmiy blok o‘rniga funksional integratsiya. Janubi-Sharqiy Osiyodagi «o‘sish uchburchaklari» tajribasi ko‘rsatganidek, amaliy integratsiya turli sur’atlarda va turli ishtirokchilar tarkibida rivojlanishi mumkin. «Markaziy Osiyo» xalqaro sanoat kooperatsiyasi markazi va Qambarota GES-1 qo‘shma loyihasi allaqachon shu tamoyil asosida amalga oshirilmoqda.