“O‘zbekneftgaz” va SOCAR zamonaviy avtomobillarga yoqilg‘i quyish shoxobchalari tarmog‘ini rivojlantirish bo‘yicha kelishuv imzoladi. Birinchi bosqichda beshta AYoQSh qurilishi rejalashtirilgan. Ozarbayjon Xalqaro banki (ABB) va “Davr Bank” o‘zbek bankining nazorat aksiyalari paketini sotib olish hamda “ABB Davr” brendi ostida loyihani ishga tushirish to‘g‘risidagi hujjatni rasmiylashtirdi.
Shuningdek, davlat rahbarlari ishtirokida “Matanat-A” kompaniyasining gips zavodi hamda “Landau Education Group”ning ikkita STEAM-maktabi ochildi. “Sea Breeze Uzbekistan” sayyohlik va turar joy majmuasi, “Baku City” turar joy majmuasi, tarkibida kumush bo‘lgan rudani qayta ishlash fabrikasi va yangi meva bog‘lari qurilishiga start berildi.
Yangi tashabbuslar oltin va noyob yer metallarini qazib olish, qurilish materiallarini ishlab chiqarish, uy-joy qurilishi hamda qishloq xo‘jaligi mahsulotlarini qayta ishlash sohalaridagi loyihalarni o‘z ichiga olgan amaldagi investitsiya portfelini to‘ldirdi.
